НОМТ 1-Р БАГИЙН ИНХ
Зуунмод сумын Номт 1-р багийн Иргэдийн Нийтийн Хурал зохион байгуулагдлаа. Тус хуралд тухайн тойргоос сонгогдсон Аймгийн ИТХ-ын Төлөөлөгч Б.Жигмэддорж, сумын ИТХ-ын Төлөөлөгчид, багийн удирдлага болон иргэдийн төлөөлөл оролцов.
Хурлаар хэлэлцсэн гол асуудлууд:
- Хөрөнгө оруулалт, бүтээн байгуулалт: 2026 онд улс, аймаг, орон нутгийн төсвийн хөрөнгө оруулалтаар Номт 1-р багт хэрэгжүүлэх төсөл, арга хэмжээний төлөвлөгөөг иргэдэд танилцууллаа.
- Төрийн үйлчилгээний мэдээлэл: Иргэдэд төрийн үйлчилгээг ойртуулах, мэдээлэл зөвлөгөө өгөх зорилгоор Улсын бүртгэлийн хэлтэс, Аймгийн Цагдаагийн газар, Нийгмийн даатгалын хэлтэс, Хот тохижуулах газар болон "Төв Чандмань” ДЭХГ-ын төлөөллүүд холбогдох мэдээллийг хүргэв.
Иргэдийн оролцоо, санал хүсэлт:
Хэлэлцүүлгийн үеэр багийн иргэд орон сууцны халаалт, дулааны хангамжийн асуудалд онцгойлон анхаарал хандуулж, санал хүсэлтээ илэрхийллээ. Мөн хог хаягдлын менежмент болон багийн нутаг дэвсгэрт өрнөж буй бүтээн байгуулалтын ажлын явц, чанарын талаар асуулт асууж, холбогдох албан тушаалтнуудаас хариулт авсан юм.
Уулзалтын төгсгөлд иргэдээс гарсан санал, гомдлыг нэгтгэн цаашид хэрэгжүүлэх үйл ажиллагааны төлөвлөгөөнд тусган ажиллахаар шийдвэрлэлээ.
*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*
ЛАНС 2-Р БАГИЙН ИНХ
Зуунмод сумын Ланс 2-р багийн Иргэдийн Нийтийн Хурал (ИНХ) 2026 оны 03 сарын 31-ний өдөр амжилттай зохион байгуулагдлаа. Хуралд тухайн тойргоос сонгогдсон Аймгийн ИТХ-ын төлөөлөгч, Зуунмод сумын Засаг даргын орлогч Б.Баярмагнай болон сумын ИТХ-ын төлөөлөгчид, багийн удирдлагууд, 80 гаруй иргэд оролцож, орон нутгийн тулгамдсан асуудлаа хэлэлцэв.
Хурлын онцлох үйл явдлууд:
- Хөрөнгө оруулалт ба Төлөвлөлт: 2026 онд улс, аймаг, орон нутгийн төсвийн хөрөнгө оруулалтаар Ланс 2-р багт хийгдэх ажлын төлөвлөгөөг танилцууллаа. Үүнд дэд бүтэц, тохижилтын чиглэлээр хэрэгжүүлэх арга хэмжээг голлон тусгасан байна.
- Төрийн үйлчилгээний нэгдсэн мэдээлэл: Иргэдэд хэрэгцээтэй мэдээллийг нэг дороос өгөх зорилгоор Аймгийн Цагдаагийн газар, Хот тохижуулах газар, Улсын бүртгэлийн хэлтэс, "Зуунмод Цэцэрлэгжүүлэлт" ОНӨАТҮГ болон газрын даамал нар өөрсдийн чиглэлээр мэдээлэл хийж, иргэдийн асуултад хариуллаа.
- Нээлттэй хэлэлцүүлэг: Багийн иргэд тулгамдаж буй асуудлуудаа хөндөн асуулт асууж, санал хүсэлтээ илэрхийлэн төлөөлөгчид болон холбогдох албаны хүмүүстэй нээлттэй ярилцав.
- Зөвлөл шинэчлэгдлээ: Хурлын үеэр Ланс багийн дэргэдэх зөвлөлийг шинэчлэн байгуулж, иргэдийн оролцоог хангах бүтцийг бэхжүүллээ.
Хуралд Ланс 2-р багийн ИНХ-ын дарга, сумын ИТХ-ын төлөөлөгч Д.Жигжидсүрэн, төлөөлөгч Д.Дарьсүрэн, О.Өрнөхцэцэг, Э.Мөнхжаргал, багийн Засаг дарга Н.Мөнх-Өнөр болон багийн зохион байгуулагч, хэсгийн ахлагч нар идэвхтэй оролцлоо.
Энэхүү хурал нь орон нутгийн хөгжилд иргэдийн дуу хоолойг хүргэх, төрийн байгууллагуудын үйл ажиллагааг иргэдэд ойртуулах чухал ач холбогдолтой боллоо.
*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*
БАЯНХОШУУ 3-Р БАГИЙН ИНХ
Зуунмод сумын Баянхошуу 3 дугаар багийн Иргэдийн Нийтийн Хурал (ИНХ) 2026 оны 3 дугаар сарын 26-ны өдөр амжилттай зохион байгуулагдлаа. Тус хурлыг багийн ИНХ-ын дарга Б.Баярхүү нээж, хурлын үйл ажиллагааг удирдан явуулсан бөгөөд иргэд өөрсдийн амьдрах орчин, багийн хөгжлийн асуудлаар санал бодлоо идэвхтэй солилцов.
Хурлын эхэнд багийн Засаг дарга Д.Оюунгэрэлийн 2025 оны үйл ажиллагааны тайланг сонсож, өнгөрсөн хугацаанд хийсэн ажлуудад иргэдийн зүгээс бодит үнэлэлт дүгнэлт өгсөн юм. Мөн ирэх 2026 онд багийн хэмжээнд хэрэгжүүлэх ажлын төлөвлөгөөг хэлэлцэн баталж, цаашдын хөгжлийн чиглэлийг тодорхойллоо.
Удирдлагуудын мэдээлэл ба иргэдийн санал шийдвэрлэлт
Энэ удаагийн хуралд Зуунмод сумын ИТХ-ын дарга Ж.Эрдэнэтоль оролцож, 2026 онд багт хийгдэх бүтээн байгуулалтын ажлууд болон цаг үеийн асуудлаар иргэдэд дэлгэрэнгүй мэдээлэл өглөө. Тэрээр иргэдээс гаргасан санал хүсэлт, тулгамдсан асуудлуудыг шуурхай шийдвэрлэхэд онцгой анхаарч ажиллахаа илэрхийлэв.
Иргэдийн оролцоотой тохижилт, цэвэрлэгээ
Хурлын үеэр багийн иргэн Болормаагийн гаргасан "Бүх нийтийн цэвэрлэгээг жил бүр хавар, намрын улиралд тогтмол зохион байгуулах" санаачилгыг иргэд санал нэгтэй дэмжиж баталсан нь хамтын оролцоонд суурилсан зөв шийдвэр болов.
Мөн "Шар дэлгүүр"-ээс урагш, хүүхдийн тоглоомын талбайгаас төв зам хүртэлх газрыг нийтийн эзэмшилд авч, иргэдийн оролцоотойгоор ногоон байгууламж, хүүхдийн тоглоомын талбай болгон хөгжүүлэх шийдвэр гаргаж холбогдох байгууллагад уламжлахаар боллоо.
*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*
НАЦАГДОРЖ 5-Р БАГИЙН ИНХ
Зуунмод сумын Нацагдорж 5-р багийн 2026 оны нэгдүгээр улирлын Иргэдийн Нийтийн Хурал (ИНХ) 3 дугаар сарын 31-ний өдөр багийн Иргэний танхимд амжилттай зохион байгуулагдлаа.
Оролцогчид:
Хурлыг БИНХ-ын дарга И.Цэрэнсугар даргалж, тухайн тойргоос сонгогдсон Аймгийн ИТХ-ын төлөөлөгч Т.Мөнхсүлд, Зуунмод сумын Засаг даргын орлогч Б.Баярмагнай, сумын ИТХ-ын төлөөлөгч Э.Энхтуяа, Б.Лхагваа, Д.Ганчимэг болон багийн Засаг дарга Р.Баярсайхан нар оролцлоо. Мөн багийн зохион байгуулагч, хэсгийн ахлагч нараас гадна 85 гаруй иргэд хүрэлцэн ирж, орон нутгийнхаа хөгжлийн асуудлаар санал бодлоо солилцов.
Хурлаар хэлэлцсэн гол асуудлууд:
- Бүтээн байгуулалт: Засаг даргын орлогч Б.Баярмагнай 2026 онд Нацагдорж багт аймаг, сумын хөрөнгө оруулалтаар хэрэгжих төсөл хөтөлбөр, тохижилт, бүтээн байгуулалтын ажлын төлөвлөгөөг дэлгэрэнгүй танилцууллаа.
- Төрийн үйлчилгээний нэгдсэн мэдээлэл: Иргэдэд төрийн байгууллагуудын үйлчилгээг ойртуулах зорилгоор дараах байгууллагуудын төлөөлөл мэдээлэл хийв:
Цагдаагийн газар: Гэмт хэргээс урьдчилан сэргийлэх, хэв журмын нөхцөл байдал (Ахлах офицер н.Маргад).
Нийгмийн даатгал болон Хөдөлмөр, халамж: Тэтгэвэр, тэтгэмж, хөдөлмөр эрхлэлтийн шинэчлэгдсэн мэдээлэл (С.Орхон болон ХХҮГ-ын төлөөлөл).
Инженер, тохижилт: Цэцэрлэгжүүлэлт, Хот тохижуулах газар, “Төв Чандмань” ДЭХГ-аас нийтийн эзэмшлийн талбайн цэвэрлэгээ, дулаан, усны хангамжийн талаар.
Эрүүл мэнд: Өрхийн эрүүл мэндийн төвөөс үзүүлж буй тусламж үйлчилгээний талаар тус тус танилцууллаа.
Иргэдийн оролцоо:
Хурлын үеэр иргэд идэвхтэй оролцож, тулгамдаж буй асуудлуудаар асуулт асууж, шийдвэр гаргах түвшний удирдлагуудад санал хүсэлтээ шууд уламжиллаа.
*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*.*
БАРУУН ЗУУНМОД 6-Р БАГИЙН ИНХ
Зуунмод сумын Баруун Зуунмод 6-р багийн Иргэдийн Нийтийн Хурлын 2026 оны нэгдүгээр улирлын хуралдаан 3 сарын 31-ний өдөр Багийн иргэний танхимд зохион байгуулагдлаа. Хуралд тухайн тойргоос сонгогдсон Аймгийн ИТХ-ын төлөөлөгч бөгөөд Засаг даргын зөвлөх Б.Отгонбаяр, сумын ИТХ-ын төлөөлөгчид, багийн удирдлагууд болон 80 гаруй иргэд оролцов.
Хурлын онцлох үйл явдлууд:
- Тайлан ба Төлөвлөгөө: Хуралдаанаар 2025 оны ажлын тайланг танилцуулж, 2026 онд улс, аймаг, орон нутгийн төсвийн хөрөнгө оруулалтаар Баруун Зуунмод багт хийгдэх бүтээн байгуулалтын ажлын төлөвлөгөөг иргэдэд мэдээллээ.
- Төрийн үйлчилгээний нэгдсэн мэдээлэл: Иргэдийн эрэлт хэрэгцээнд тулгуурлан Хөдөлмөр халамж үйлчилгээний газар, Аймгийн Цагдаагийн газар, Нийгмийн даатгалын хэлтэс, Хот тохижуулах газар болон “Төв Чандмань Дулаан”, “Зуунмод Цэцэрлэгжүүлэлт” ОНӨАТҮГ, Хүүхэд, гэр бүл хөгжил хамгааллын газар болон Өрхийн эрүүл мэндийн төвөөс үйл ажиллагааныхаа талаар иргэдэд мэдээлэл хүргэв. Мөн "Энхтайван" гэр хорооллын инженерийн шугам сүлжээний ажлыг гүйцэтгэгч "Бат комплект" компанийн төлөөлөл оролцож, иргэдийн асуултад хариулан зөвлөгөө өгч ажиллав.
- Иргэдийн оролцоо: 80 гаруй иргэн хүрэлцэн ирж, баг орон нутагт тулгамдаж буй газрын харилцаа, хог хаягдал болон бүтээн байгуулалтын асуудлаар санал шүүмжлэл хэлж, идэвхтэй оролцлоо.
- Урамшуулал: Иргэдийн оролцоог нэмэгдүүлэх, цаг баримтлах соёлыг дэмжих зорилгоор хурлын үйл ажиллагаанд эхнээс нь дуустал идэвхтэй оролцсон нэг иргэнийг "Чингис хаан" үндэсний музейн Их хааны хүндэтгэлийн өргөөнд зочлох эрхийн бичгээр шагнаж урамшуулав.
Хурлын үеэр иргэд сонирхсон асуултдаа хариулт авч, баг орон нутгаа хөгжүүлэх талаар санал бодлоо нээлттэй солилцсон үр дүнтэй уулзалт боллоо.
